盧瀚霆(Anson Lo)昨晚推出新曲〈Nah〉，MV亦正式上架，今次Anson Lo參與作曲部份，而MV中三個驅魔人造型都有玩味。不過原來在炎熱天氣中於密屋拍攝，最擔心竟然是跳到瘦：「4年嚟未試過未拍跳舞已經由頭到腳，甚至內衣褲都已經濕晒，但最擔心係瘦咗！」


Anson Lo新歌〈Nah〉帶有美式Hip Hop風，當中原來要提醒自己要學懂放鬆：「聽落好似好幼稚，但相信好多人都聯繫到，有時我會好想隱藏自己驚恐嘅一面，盡量表現一個體面嘅形象俾大家睇，變相個人愈嚟愈繃緊，所以想提醒自己學會放鬆，接受同擁抱自己軟弱嘅一面。」

歌曲由監製Edward Chan團隊一同製作，Anson Lo亦有合寫旋律：「創作時我哋會哼一啲旋律，我自己哼時會用上『Nah』字，然後靈機一觸，記起『Nah』字有『No』嘅意思，同歌曲要向收埋自己嘅個性Say No好匹配，所以就將歌名索性叫做〈Nah〉。」

而Anson Lo在MV中則扮演驅魔人：「呢個驅魔人睇落好似好型好有經驗，但原來佢好驚鬼，任何少少風吹草動都會嚇親佢，但佢會盡量冷靜，隱藏自己驚嘅一面，去完成驅魔嘅工作。」在廢墟拍攝，Anson Lo回憶：「驅魔人嘅髮型有兩隻角，係Set頭時突然諗出嚟，然後喺廢墟拍攝，係出道以嚟拍攝上最辛苦嘅一次，因為當日發出酷熱天氣警告，但我哋仲要喺咁熱嘅天氣，入一個好焗促嘅公寓景拍攝，密不透風，但著晒皮褸，裡面仲有幾件衫，好局，感覺好似就嚟暈。4年嚟未試過未拍跳舞已經由頭到腳，甚至內衣褲都已經濕晒，但最擔心係瘦咗！本身條皮褲唔使用皮帶，但拍咗3小時後要用皮帶，因為條腰幼咗，愈拍愈瘦。」